Псалом 90

Живый в помощи Вышняго, в крове Бога Небеснаго водворится.
Речет Господеви: заступник мой еси и прибежище мое,
Бог мой, и на Него уповаю.

Яко Той избавит тя от сети ловчи, и от словесе мятежна,
плещма Своима осенит тя, и под криле Его надеешися:
оружием обыдет тя истина Его.

Не убоишися от страха нощнаго, от стрелы летящия днем,
от вещи во тьме преходящия, от сряща и беса полуденнаго.
Падет от страны твоея тысяща, и тма одесную тебе,
к тебе же не приближится.

Обаче очима твоима смотриши,
и воздаяние грешником узриши.

Яко Ты, Господи, упование мое,
Вышняго положил еси прибежище твое.

Не приидет к тебе зло, и рана не приближится телеси твоему,
яко Ангелом Своим заповесть о тебе
сохранити тя на всех путех твоих.

На руках возмут тя, да не преткнеши о камень ногу твою.
На аспида и василиска наступиши,
и попереши льва и змия.

Яко на Мя упова, и избавлю и: покрыю и, яко позна имя Мое.
Воззовет ко Мне, и услышу и: с ним есмь в скорби,
изму и, и прославлю и.

Долготою дней исполню и,
и явлю ему спасение Мое.

Аминь.